كان راىء لما الشباب نزلوا الميدان وعملوا جرافيتى
على الحيطان يحكى الثوره والشهدا
قلت ياربى هى شوارع القاهره ناقصه تشويه
مش كفايه الفوضى اللى فى كل حته والشوارع
بتئن من القمامه اللى فى كل حته والمواصلات والزحمه
اصل مش ناقصه كمان جرافيتى وتقاليع شباب فاضى
قلت امتى هنخلى القاهره فعلا عاصمه وقعدت معترضه اوووى
لحد اول امبارح لما سمعت حكم المحكمه فى قضيه الشهدا
وان كل المتهمين براءه
اتجننت وقلت ازاى يعنى براءه امال اللى فى القبور
دول هما اللى ماتوا لوحدهم
وكلام وكلام وكلام وكل الناس بتتكلم
ومافيش فعل
وقلت يا شهيد حقك محفوظ
ياشهيد اخواتك رسموك ودونى التاريخ على حيطان
وابواب قبل ما يغيروا التاريخ ويتقلب الحق باطل
والباطل حق
ياشهيد حقك موجود اخواتك دونى ورسموا
مش بلون او الوان لا دونى بدمك
كفاحك صوره وتاريخ يشهده الكل كبير وصغير
من غير تزوير او كلام او فرامانات
ياشهيد الحق راجع
الحق راجع
الحق راجع
يقول محمد متولى الشعراوى:
"" ان الباطل جندى من جنود الحق لانه
حين يعلو يؤلم الناس بشراسته فيصيح الناس :
اين الحق فيظهر الله الحق "
ليست هناك تعليقات:
إرسال تعليق